देउवाले पत्याएनन प्रचण्डलाई, भने ओली सरकार नै ठिक



 

नेकपा माओवादी केन्द्रले केपी ओली सरकार कायमै राख्ने कि ओलीलाई सत्ताबाट हटाउने भन्ने बारेमा प्रमुख विपक्षी नेपाली कांग्रेस र जनता समाजवादी पार्टीलाई अन्तिमपल्ट सोध्ने भएको छ । फागुन ११ गते प्रतिनिधिसभा पुनःस्थापना भएकै दिनदेखि ओली सत्ता ढालेर नयाँ सरकार बनाउन अग्रसर भएको तत्कालीन नेकपाको प्रचण्ड-माधव पक्षको पहलमा कांग्रेस सभापति शेरवहादुर देउवा उत्साही नभएकोमा अहिलेसम्म पनि देउवाले निर्णायक कदम चाल्न खोजेका छैनन् ।

कांग्रेस र जसपाले अविश्वास प्रस्ताव ल्याउने सहमति जनाए सरकारलाई दिएको समर्थन फिर्ता लिन तयार भएर बसेको माओवादी केन्द्र पछिल्ला दिनमा निराश बनेको छ । कांग्रेसले ओलीको राजीनामा माग्दै आफ्नो नेतृत्वमा नयाँ सरकार बनाउने निर्णय गरेपछि माओवादी अध्यक्ष प्रचण्ड उत्साही भएका थिए ।

कांग्रेसले सरकार गठनको निर्णय गरे पनि अहिलेसम्म माओवादी र जसपासहितको बैठक समेत बोलाउन नचाहानुले सभापति देउवाको नियत ओली हटाउने नदेखिएको माओवादी नेताहरु बताउँछन् । माओवादी प्रवक्ता नारायणकाजी श्रेष्ठले कांग्रेसले संस्थागत निर्णय गर्नु सकारात्मक रहे पनि सभापति देउवाले नयाँ सरकार गठनको पहल नथालेको बताए ।

श्रेष्ठले भने, ‘विशेषगरी कांग्रेस सभापति देउवा र जसपा अध्यक्ष महन्थ ठाकुरजीको धारणा के हो ? हामी उहाँहरुको अन्तिम निर्णय खोजिरहेका छौं । हामीले सरकारलाई दिएको समर्थन फिर्ता लिएन भनेर उत्तेजित बनाउने र केपी ओलीलाई अर्को प्रतिगमन गर्न सघाउने खालका भड्काउवादी कुरा आइरहेका छन् ।’

माओवादी केन्द्र कांग्रेस र जसपाले सरकार ढाल्ने निर्णय गरेको ५ मिनेटभित्र समर्थन फिर्ताको सूचना संसदमा दर्ता गराउन तयार रहेको श्रेष्ठले बताए । तर वैकल्पिक सरकारको चित्र प्रष्ट नभई समर्थन फिर्ता लिँदा ओलीलाई थप षड्यन्त्र गर्ने मौका मिल्ने र मुलुकलाई पुनः चुनावमा लैजाने तथा त्यो चुनाव नहुने अवस्था आउने उनको भनाइ छ ।

अब माओवादीले देउवा र ठाकुरलाई अन्तिमपटक सोध्ने भएको छ । ओली सरकार ढाल्ने हो भने अविश्वास प्रस्तावमा अघि बढ्न र ओलीलाई नै कायम राख्ने हो भने त्यो पनि निर्णय गर्न माओवादीले अन्तिमपटक आग्रह गर्ने भएको छ ।

माओवादी स्रोतले भन्यो, ‘देउवा र महन्थ ठाकुर अन्ततः ओलीकै लाइनमा उभिने संकेत देखियो । उनीहरु अविश्वास प्रस्ताव ल्याउँदैनन् भने पनि भन्नुपर्‍याे त्यसो भएपछि हामी समर्थन फिर्ता लिएर ओलीविरुद्ध संघर्षमा जान्छौं । हामीले समर्थन फिर्ता लिएपछि ओली संविधानको धारा ७६ को उपधारा ३ अनुसार ठूलो दलको हैसियतमा प्रधानमन्त्री हुने र चुनाव घोषणा गर्ने अवस्था आउँछ ।’

देउवाले सरकार गठनको पहल नलिएकोमा माओवादीले गम्भीर आशंका जनाएको छ । पार्टीको केन्द्रीय कार्यसमितिले नयाँ सरकार गठनको पहल लिने निर्णय गरेपनि देउवाले प्रचण्डसँग भेट्न समेत नचाहनुले उनी मंसिरमा चुनाव गराउने पक्षमा उभिएको आशंका माओवादीको छ ।

एक माओवादी नेताले भने, ‘अहिले एमालेको माधव नेपाल पक्ष सबैभन्दा अप्ठेरोमा छ,ओलीलाई हटाउँदा राजनीति पनि सही दिशामा जाने र माधव नेपाललाई पनि न्याय दिने अवस्था आउने थियो । तर ओलीसँगै मिल्न देउवा र महन्थलाई देशभित्र र बाहिरबाट दवाव बढेको देखिन्छ । अब हामीले राजनीतिक निर्णयमा जानुअघि अन्तिमपटक देउवालाई सोध्छौं ।’

यदि देउवा र महन्थ ओलीलाई हटाउन तयार नहुने हो भने अविश्वास प्रस्तावको पनि अर्थ नहुने बुझाइ माओवादीको छ । पारित नहुने गरी अविश्वास प्रस्ताव ल्याउँदा त्यसले ओलीलाई झन् बलियो बनाउने र एक वर्षसम्म अर्को प्रस्ताव पनि ल्याउन नमिल्ने भएकाले कच्चा खेलमा माओवादी नलाग्ने ती नेताको भनाइ छ ।

माओवादीले समर्थन फिर्ता लिएपछि ओली तत्कालै विश्वासको मत लिन जाने वा राष्ट्रपतिले संविधानको धारा ७६ को उपधारा ३ बमोजिम अघि बढ्ने अवस्थामा मुलुक पुनः चुनावमै जाने देखिन्छ । माओवादी प्रवक्ता श्रेष्ठले आफूहरु संसदको पूरै कार्यकालको सुनिश्चितता हुनुपर्छ भन्ने पक्षमा रहेकाले जिम्मेवार ढंगले अघि बढिरहेको बताए ।

माओवादी केन्द्रले कांग्रेसको रामचन्द्र पौडेल पक्ष र जसपाको बाबुराम, उपेन्द्र पक्षसँग संवाद गरिरहेको छ । तर निर्णायक ठाउँमा देउवा र महन्थ रहेकाले परिणाम निस्केको छैन । अन्तिमपटक ओलीलाई फाल्ने कि काँध हाल्ने भन्ने प्रष्ट जवाफ खोजिने र त्यसपछि ओलीविरुद्ध रहेका सबै दलभित्रका शक्तिहरुसँग मिलेर संघर्षमा जाने तयारी माओवादीको छ ।

माओवादीले सरकारलाई दिएको समर्थन फिर्ता नलिएको सन्दर्भमा महन्थ ठाकुर पक्षले दिएका अभिव्यक्तिलाई अत्तो थाप्ने जुक्तिका रुपमा नेताहरुले लिएका छन् । आफूहरुले ओली पक्षका लागेका निर्वाचित सांसदहरुको पद समेत खारेज गरिसकेको भन्दै समर्थन फिर्ताको कागज प्रचण्डको गोजीमै रहेको नेताहरु बताउँछन् ।

प्रचण्ड निकट नेताले भने, ‘देउवा र महन्थले हामी अविश्वास प्रस्ताव ल्याउँदैनौं भनुन्,एक मिनेटमा सरकारलाई दिएको समर्थन फिर्ता लिएर ओलीविरुद्धको नयाँ संघर्षमा जान्छौं । त्यो अबस्थामा कांग्रेस,जसपा र एमालेभित्रका प्रतिगमनविरोधी शक्तिहरु एकजुट हुने नयाँ ध्रुवीकरण शुरु हुन्छ । अब यहि अवस्थामा हामी रहन सक्दैनौं, अन्तिमपटक सोध्ने हो ।’

प्रतिक्रिया दिनुहोस
नेकपा एमालेका नेताहरूको कार्यविभाजन (सूचीसहित)

    नेकपा एमालेले २६४ सदस्यीय दशौं राष्ट्रिय महाधिवेशन आयोजक कमिटीका सदस्यहरुको कार्यविभाजन

प्रेस चौतारीको इञ्चार्जमा सूर्य थापा

  प्रेस चौतारी नेपालको इञ्चार्जमा सूर्य थापाले जिम्मेवारी पाउनु भएको छ । आज

उपचुनावमा बादललाई नै उम्मेदवार बनाउने एमालेको निर्णय

  प्रधानमन्त्री एवं नेकपा एमालेका अध्यक्ष केपी शर्मा ओलीले एमालेमा प्रवेश गरेका कारण

एमालेको स्थायी कमिटीबाट माधव- झलनाथ गुट आउट

    नेकपा एमालेको स्थायी कमिटीबाट माधव नेपाल पक्षधर नेताहरू हटाइएका छन् ।