पोखरा पुगेर पर्यटनमन्त्री भट्टराईले सुनाएका २० लाख पर्यटक भित्र्याउने योजना



 

सरकारले सन् २०२० मा २० लाख पर्यटक भित्र्याउने लक्ष्यसहित नेपाल भ्रमण वर्षको घोषणा गरेको छ । भ्रमण वर्ष सुरु हुन अब २ दिनमात्रै बाँकी छ ।

भ्रमण वर्षको मुखमै पोखरामा हुन लागेको सडक महोत्सवमा सहभागी हुन आएका स‌ंस्‍कृति, पर्यटन तथा नागरिक उड्डयनमन्त्री योगेश भट्टराईले सरकारले लक्ष्य पूरा गर्ने गरी तयारी भइरहेको बताए । अन्तर्राष्ट्रिय विमानस्थलस्थलको क्षमता वृद्धि, अन्तर्राष्ट्रिय उडानको विस्तार, अन्तर्राष्ट्रिय प्रचारप्रसार र पर्यटकीय संरचना तयार भएका कारण पनि सरकारले २० लाख पर्यटक भित्र्याउने उनको दाबी थियो ।

नेपाल भ्रमण वर्ष २०२० उद्घाटन समारोहमा एक दर्जन हाराहारी मुलुकका पर्यटनमन्त्री सहभागी हुने मन्त्री भट्टराईले जानकारी दिए । उनका अनुसार भारत, चीन कम्बोडियासहित एक दर्जन मुलुकका पर्यटनमन्त्री आउने निश्चित भएको छ ।

चीन, भारत, म्यानमार, युएई, कम्बोडिया, जापान, बंगलादेश, कतारलगायतका देशबाट पर्यटनमन्त्री भ्रमण वर्षको सुभारम्भ कार्यक्रममा आउने भट्टराईले बताए । भ्रमण वर्षका निम्ति नेपाल सरकारले ९ करोड रुपैयाँ छुट्याएको तर भ्रमण वर्षको सचिवालयले ६५ करोड रुपैयाँको बजेट अनुमान गरेको छ । अपुग बजेट नेपाल सरकारले दिने उनले बताएका थिए ।

 

पर्यटनमन्त्रीले सुनाएका योजना उनकै शब्दमा :

सन् २०२० लाई हामी पर्यटन भ्रमण वर्षको रुपमा मनाउँदैछौं । विदेशबाट आउने पर्यटकको संख्या २० लाख रुपैयाँ पुर्‍याउने हाम्रो घोषित लक्ष्य छ । यो, मूलभूत हिसाबमा हवाइ मार्गबाट आउने पर्यटकको संख्या हो ।

पर्यटक आउनलाई पूर्वाधारको पर्याप्तता चाहिन्छ । यसका निम्ति एक मात्र अन्तर्राष्ट्रिय विमानस्थल त्रिभुवन विमानस्थलको क्षमता बढाएका छौं । सन् २०१८ भन्दा सन् २०१९ मा पर्यटकको संख्या केही प्रतिशत घटेको छ । त्यतिबेला मुख्य केही कारण थिए । काठमाडौं–दिल्ली, दिल्ली काठमाडौं उडान भर्दै आएको जेट एयर आफैं विघटनको  स्थितिमा गयो र त्यसले उडान बन्द गर्‍यो ।

अर्को मलेसियाको क्वालालम्पुर–काठमाडौं, काठमाडौं–क्वावालालम्पुर हवाई सेवा दिइरहेको एयर एसियाले पनि उडान बन्द गर्‍यो । सुरुमा ३ महिना र पछि १ महिना त्रिभुवन विमानस्थलमा रन वेलगायतको काम गर्न बेलुका ७/८ बजेबाट बन्द गर्नुपर्‍यो । यी कारणले विगतमा २५ प्रतिशतमा वृद्धि भएको पर्यटकको संख्या २०१९ मा १० देखि १५ प्रतिशतको हाराहारीमा सीमित छ ।

२०२० मा प्रवेश गर्दा यी सबै स्थितिबाट माथि उठेका छौं । त्रिभुवन विमानस्थलको मैदान पनि खुला भइसकेको छ । क्षमता बढिसकेको छ । थप अन्तर्राष्ट्रिय विमान उड्नका लागि पनि अब समस्या छैन । अहिले काठमाडौं विमानस्थल २१ घण्टा सञ्चालन भएको छ र अब २४ सै घण्टा नै चलाउन सक्ने अवस्थामा आइपुगेका छौं ।

 

दिल्ली–काठमाडौं, काठमाडौं दिल्ली उडान पनि केही नयाँ एयरलाइन्सहरुले थपेका छन् । एयर एसियालाई पनि फेरि उडान अगाडि बढाऊ भनेका छौं । अरु केही नयाँ एयरलाइन्स पनि यो बीचमा थपिएका छन् । चीनका विभिन्न सहरमा उडान थपिएका छन् । नेपालको हिमालयन एयरलाइन्सले चीनको बेइजिङलगायतका विभिन्न सहरमा उडान सुरु गरेको छ । नेपाल वायु सेवा निगमले यसअघिदेखि नै उडान गरिरहेको छ । अब छिट्टै नै अन्य सहरमा पनि उडान थप्ने क्रममा छौं ।

२०२० को मध्यमा पुग्दानपुग्दै गौतम वुद्ध अन्तर्राष्ट्रिय विमानस्थल सञ्चालनमा ल्याउँछौं । काठमाडौंमा अन्तर्राष्ट्रिय विमानस्थलले झण्डै ७२ लाख मान्छेहरुलाई सुविधा दिइराखेको छ । यो संख्या हरेक वर्ष १३ प्रतिशतले वृद्धि भइरहेको छ । गौतम वुद्ध विमानस्थल सुरु भएपछि थप पर्यटक नेपालमा आउने सहज वातावरण बन्छ । यी सबै कुराले पनि हामी २० लाख पर्यटक पुर्‍याउन सक्छौं । हाम्रो लक्ष्य पूरा गर्ने आधार यी हुन् ।

नेपालको अन्तर्राष्ट्रिय बजार, छवि आज धेरै माथि उठेको छ । यो पनि अर्को आधार हो । नेपाल दुनियाँको गन्तव्य लिस्टमा परिराखेको छ । अन्तर्राष्ट्रिय मिडियाहरुले पनि नेपाल उत्कृष्ट गन्तव्य हो भनेर प्रचार गरिराखेका छन् । भारत र चीनले विशेष ढंगले पर्यटन वर्षलाई सहयोग गर्ने बाचा गरिराखेको छ ।

 

२०२० को जनवरी १ मा काठमाडौंसँगै सातै प्रदेशबाट भ्रमण वर्ष सुभारम्भ गर्दैछौं । सुभारम्भका क्रममा विभिन्न देशका पर्यटन मन्त्रीहरुलाई निमन्त्रणा गरेका छौं । चीन, भारत, म्यानमार, युएई, कम्बोडिया, जापान, बंगलादेश, कतारबाट आउँदै हुनुहुन्छ । यो उद्घाटन कार्यक्रमबाट मात्रै पनि नेपाल भ्रमण वर्षको प्रचार हुन्छ ।

जनवरी ७ मा विश्वभरिका सबै नेपाली कुटनीतिक नियोगहरुले भ्रमण वर्षको सुभारम्भ आआफ्नो देशमा गर्नुहुन्छ । गैरआवासीय नेपाली संघसँग हामीले सम्झौता नै गरेका छौं । विश्वका सबैजसो मुलुकमा कुनै न कुनै प्रवर्द्धनका कार्यक्रम गर्ने भनेका छौं ।

 

यही डिसेम्बर ३१ मा विश्वका सबैभन्दा अग्ला टावरहरुमा नेपालको राष्ट्रिय झण्डा र भ्रमण वर्षको प्रवर्द्धन गर्ने भनेर गैरआवासीय नेपाली साथीहरु लागिरहनुभएको छ । साथै अन्तर्राष्ट्रिय मिडियाहरुमा भ्रमण वर्षको प्रचारका निम्ति सम्झौता पनि गरेका छौं ।

पोखरा नेपालकै प्रमुख पर्यटकीय गन्तव्य हो । स्वदेशी र विदेशीहरुका निम्ति उत्कृष्ट गन्तव्य हो । प्रदेश र स्थानीय सरकारले पनि उत्साह देखाइरहनु भएको छ । पोखराले अझ आफ्नो क्षमता बढाउनुपर्छ । २०२१ को सुरुमै पोखरा अन्तर्राष्ट्रिय विमानस्थल सञ्चालनमा आउँछौं । अहिलेसम्म ५२ प्रतिशत काम सकिइसकेको छ । यो धेरै राम्रो प्रगति हो ।

६ महिना अगाडि नै विमानस्थलको काम सकिने छ । त्यसैले पोखराको अहिलेको संरचनाले मात्रै पुग्दैन । यहाँको रात्रीकालीन जीवनलाई अझ बढाउनुपर्छ । प्रदेश र स्थानीय सरकार अनि पर्यटन व्यवसायीसँग बसेर पोखरालाई कसरी अझै व्यवस्थित बनाउन सकिन्छ भनेर लाग्ने छौं ।

पोखरालाई विशेष पर्यटकीय गन्तव्यका रुपमा विकास गर्न अझै के कस्ता प्याकेज अगाडि बढाउने हामीले योजना बनाइरहेका छौं । म निजी क्षेत्रलाई पनि भन्न चाहन्छु आउनुस् पीपीपी मोडलमा काम गरौं ।

थप पर्यटकीय गन्तव्य र ठूरा संरचना बनाऔं म आह्वान गर्न चाहन्छु । किनभने अन्तर्राष्ट्रिय विमानस्थल चल्दैछ । त्यो बेला योभन्दा थप केही पोखराले दिन सकेन भने एयरपोर्टको बिजनेसले मात्रै धान्दैन ।

प्रतिक्रिया दिनुहोस
सुनसरी अनेरास्ववियु संयोजकमा जीबि गजल

    नेकपा निकट बिद्यार्थी संगठन अनेरास्ववियूले जिल्ला संयोजकमा इटहरीका जीबि गजल चुनिएका

सभामुखको निर्वाचन माघ १२ मा

    उपसभामु्ख डां शिवमाया तुम्बाहाम्फेले संसदमा सम्बोधन गर्दै राजिनामा दिएपछि अहिले ४

नेकपामा ‘तँ’ भन्ने शब्द प्रयोग गरे पार्टीबाट निस्काशन

    सत्तारूढ नेकपाले नेता कार्यकर्ताको आचरणमा सुधार ल्याउन ११ बुँदे आचारसंहिता जारी

शिवमाया तुम्बाहाङफेलाई कानुनमन्त्री बनाउने तयारी

    शिवमाया तुम्बाहाङफेलाई उपसभामुखबाट राजीनामा गराएपछि सत्तारुढ दल नेकपाभित्र उनको ब्यवस्थापन के